Allir eiga að vera mega hressir og með brennandi áhuga

– Kröfur um samskiptahæfni í atvinnuauglýsingum og upplifun einhverfra einstaklinga á íslenskum vinnumarkaði

Hvað þýðir „framúrskarandi hæfni í mannlegum samskiptum“ og hverjir sjá sig í slíkri starfslýsingu?

Á þessum Dokkufundi kynnir Bjarney rannsókn sína á kröfum um samskiptahæfni í atvinnuauglýsingum og upplifun einhverfra einstaklinga á íslenskum vinnumarkaði.

Með greiningu atvinnuauglýsinga og viðtölum við einhverfa einstaklinga var kannað hvernig ríkar og óljósar hæfniskröfur geta skapað hindranir í ráðningarferlum.

Fjallað verður um helstu niðurstöður og hvernig skýrari kröfur, sem endurspegla raunverulegar þarfir starfsins, geta stuðlað að inngildingu og aukið tækifæri einhverfra á vinnumarkaði.

Hver verður með okkur?
Bjarney L. Bjarnadóttir.
Hún er er stundakennari við Háskólann á Bifröst og sérkennari við Grunnskóla Borgarfjarðar.

Hún hefur lokið meistaranámi á sviði forystu, mannauðsstjórnunar og verkefnastjórnunar og er með BS-gráðu í íþróttafræði.

Hún hefur fjölbreytta reynslu af kennslu, stjórnun og félagsstörfum, og er formaður Þroskahjálpar á Vesturlandi.

Rannsókn hennar fjallar um kröfur um samskiptahæfni í atvinnuauglýsingum og upplifun einhverfra einstaklinga á íslenskum vinnumarkaði.

Hæfniþættir: Á Dokkufundum er fjallað um efni í samræmi við nýlegar hæfnirannsóknir, um hvaða hæfni er æskilegt í dag og talið er að verði í eftirspurn á næstu árum, hvort sem horft er til vinnu og vinnumarkaðar, eða til að dafna í samfélagi framtíðarinnar.