Af hverju taka skynsamir stjórnendur stundum slæmar fjárhagsákvarðanir?

Stjórnendur þurfa ekki að vera fjármálasérfræðingar til að taka góðar ákvarðanir, en þeir þurfa að þekkja helstu kennitölur og skilja hvernig þeir meta og taka áhættu og ákvarðanir.

Á þessum Dokkufundi verður fjallað um hvernig mannlegir þættir, svo sem of mikil bjartsýni, ótti við tap og tilhneiging til að verja fyrri ákvarðanir, geta haft áhrif á ákvarðanir um fjárfestingar, kostnað og fjármögnun.

Hver verður með okkur?

Sólveig R. Gunnarsdóttir, stofnandi og framkvæmdastjóri STRATA Advisory.

Hún hefur löggildingu sem verðbréfamiðlari og víðtæka reynslu af fyrirtækjaráðgjöf, meðal annars á sviði fjármögnunar, verðmats og endurskipulagningar. Hún situr í stjórnum Eventum Travel, GeoSilica og Disact og hefur áður setið í stjórnum KEA Hótela og Ölgerðarinnar.

Sólveig er stundakennari í iðnaðarverkfræði við Háskóla Íslands og er með B.Sc.-gráðu í iðnaðarverkfræði frá HÍ og MBA-gráðu frá Hult International Business School í Bandaríkjunum og Kína. Sólveig hefur jafnframt starfað á alþjóðavettvangi. 

Hæfniþættir: Á Dokkufundum er fjallað um efni í samræmi við nýlegar hæfnirannsóknir, um hvaða hæfni er æskilegt í dag og talið er að verði í eftirspurn á næstu árum, hvort sem horft er til vinnu og vinnumarkaðar, eða til að dafna í samfélagi framtíðarinnar.