Hvernig selur maður þurrasta brauðið í bakaríinu?

Fyrirlesturinn er haldinn í samvinnu við Skjalastjórnunarfélag Íslands.

Stjórnun skjala og upplýsinga er nauðsynlegur hluti hverrar skipulagsheildar og þá sérstaklega í opinberri starfsemi þar sem skilaskylda er á gögnum til skjalasafns. Hvernig varð „Hlaðan“ þekkt vörumerki innan stjórnsýslu Reykjavíkur og hvernig er hægt að ná mikilvægum skilaboðum í gegn með frjóum og frískum hætti?

Á Dokkufundinum mun Bjarni Jón segja okkur frá því hvernig skrifstofa upplýsinga- og skjalastýringar á þjónustu- og nýsköpunarsviði Reykjavíkurborgar hefur staðið að fræðslu- og kynningarmálum við innleiðingu Hlöðunnar, upplýsingastjórnunarkerfis Reykjavíkurborgar; sjá dæmi um afurðirnar sem bjóðast starfsfólki; og dæmi um verkfæri sem gott er að hafa tiltæk við gerð kynningarefnis.

Hver verður með okkur?
Bjarni Jón Sveinbjörnsson, hlöðusérfræðingur hjá Reykjavíkurborg.

Hæfniþættir: Á Dokkufundum er fjallað um efni í samræmi við nýlegar hæfnirannsóknir, um hvaða hæfni er æskilegt í dag og talið er að verði í eftirspurn á næstu árum, hvort sem horft er til vinnu og vinnumarkaðar, eða til að dafna í samfélagi framtíðarinnar.