Sýnileiki og sjálfstraust

Mörg þráum við að verða sýnilegri í starfi, taka meira pláss og sækjast eftir nýjum áskorunum, en eitthvað heldur aftur af okkur. Það getur verið sjálfsefi, ótti við að mistakast eða rótgróin innri trú um að við séum „ekki alveg tilbúin“ dregur úr okkur kraft og vilja til verka, jafnvel þegar við vitum í hjarta okkar að við höfum meira fram að færa og þráum að láta ljós okkar skína.

Í Dokkufundinum skoðum við:

•  Hvað hamlar mér? Hvaða hugsanir, viðhorf eða hegðun heldur aftur af mér?
•  Hvernig styrki ég trúna á mig sjálfa/sjálfan/sjálft? Jafnvel í óvissu og breytilegu umhverfi.
•  Hvernig byggi ég upp sjálfstraust til að vera sýnilegri, hefja upp raust mína og stíga fram af áræðni?

Við tengjum þetta svo við framtíðarsýn og aðgerðir:

•  Hvaða markmið vil ég setja mér næstu 3–6 mánuði?
•  Hvaða litlu skref koma mér nær því að verða sú/sá sem ég vil vera?
•  Hverju þarf ég að sleppa eða breyta til að skapa pláss fyrir það sem skiptir mig máli?

Erindið er byggt á aðferðum markþjálfunar og markmiðið er að hvetja þátttakendur til að sjálfskoðunar og hvetja þá til að rísa upp og taka pláss og stuðla þannig að eigin vexti.

Hver verður með okkur?

Lella Erludóttir

Lella er PCC vottaður markþjálfi, mannauðsráðgjafi, leiðtogi og rebel. Hún er baráttukona gegn loddaralíðan sem vinnur að því hörðum höndum að auka veg mennskunnar innan skipulagsheilda. Hún vill sjá mennskari leiðtoga sem móta manneskjulegri fyrirtækjamenningu sem styður við berskjöldun, bjartsýni, tilfinningar, fjölbreytileika og breidd hins mannlega.

Lella á LinkedIn

Misstir þú af fundinum eða viltu rifja upp?

Skráðu þig á Dokkufundinn á hefðbundinn hátt og þú færð sendan tengil á upptöku frá fundinum. Allir sem eru skráðir á Dokkufundinn áður en honum lýkur fá sjálfkrafa senda upptökuna í tölvupósti.
Mikilvægt: Ef þú hefur áður skráð þig á fundinn en finnur ekki upptökuna í tölvupóstinum þínum, þarftu að afskrá þig af fundinum – en það er einfalt – þú smellir á „Skrá mig af þessum fundi“ hér fyrir neðan skráningarformið og skráir þig svo aftur – þá færðu staðfestingarpóst með tengli á upptökuna“.
ATH: þú þarft kannski að gera Refresh á síðuna á milli.